國難五金聲明

就網民Anita Wong 於其開設的專頁「國難先生手記」,發表多項不實言論意圖抹黑本店,我們有以下回應:-

– 與S 小姐及其他前員工的糾紛

我們留意到,Anita Wong 的指控大部分建基於前合作夥伴S 小姐及其他前員工提供的資料。

當時S小姐與腦細因生意糾紛決定終止合作並簽署協議,其中有條款要求雙方保密內容。由於有此保密協定,腦細從未向外界披露S 小姐如何虧空貨物,導致腦細要與S 小姐終止合作。

(以下係公關聽腦細發開口夢時亂up 既嘢,內容絕對虛構,如有雷同實屬巧合:

“係而家先得閒招呼你班鬼AC~

一開始係深水埗既時候我已經知道有人’偷/借貨’,我唔出聲,係因為我當我班夥計’偷/借’我貨都好,去左沙田同人交收都好,都’可能’係幫到人,有功用有做到野,呢件事我吞左佢就算,但心已經有個底。

疑人勿用。所以去到中大理大我係拒絕再’借’貨俾當時S小姐團隊其中一位TB員工派貨出去,重要時刻我親自處理,親自聯絡車隊派貨出去唔好?填色唔係填全日架嘛:),點知S小姐同佢班S Team同事係未經我同意下,就聲稱已經將剩低既貨’派’曬出去。

可惜天網恢恢,後尾出面手足主動聯絡我話返俾我知,S Team全員將據稱’派’曬出去既貨賣佐俾人。有根有據,因為呢件事S小姐理虧在先,所以雙方都同意終止合作,你賠償我收錢,停止合作關係。

但既然你哋而家指控,話我係誣蔑,咁請就着我咁樣做而導致S 小姐同埋佢老公親手交左九萬蚊現金俾我嘅損失,麻煩你哋報警🙏🏻,咁樣陪左錢俾我,係你哋班仆街奸有奸輸,依家仲要黐埋啲鄰國大媽度?仲抹黑?

總之都係果句,錢佢哋係心甘命抵交到我手上嘅,既然覺得係我呃人嘅,咁就落嚟鋪頭當面對質啦”)

現時S 小姐違反保密協議,腦細表示會保留權利追究一切損失。

整場指控,S 小姐及其他前員工始終未有親自發聲,而是經由隱藏真身既網民發佈S 小姐一方片面之詞,藉此逃避可能引起的法律責任。本店就此表示強烈遺憾,並保留一切追究權利。

本店亦在此強調,現時本店腦細及其他幾名員工及前員工,仍然因為8/31 及9/30 兩次拘捕被刑事調查中。本店留意到Anita Wong 最近的發文有提及與刑事案有關案情。本店強烈呼籲S 小姐咨詢法律意見,避免影響自身權益。

我們亦在此呼籲,為免花生價格持續高企,本店不會再回應任何S 小姐丶Anita Wong 或其他人士針對我們惡意中傷的片面之詞,直至本店全部刑事調查結束為止。

– 營運方針

除以上不實指控,我們亦想趁機在此回應其他批評:-

腦細搞社運賺大錢?

本店於成立時已強調以商業模式運作,賺錢是本店營運目的。本店呼籲大家留意星火同盟因涉嫌洗黑錢被捕及凍結戶口一案的緣由。

本店由於生意興隆,導致腦細的確賺到盤滿砵滿,腦細本人亦不時出文炫富,以證明本店的確以商業模式運作,並非社運團體或支援社運。本店亦樂見斷章取義浄係抽呢段黎鬧腦細的。

腦細半年賺70 萬食人血饅頭?

S小姐聲稱本店營運半年盈利70 萬,本店同意營運半年 賬 面 盈 利 的確有此數,而腦細絕對丶絕對不會公開在扣除 無 法 入 賬 的 支 出 後,實際盈利(甚至虧損)如何。

腦細冇幫手足?

腦細係絕對丶絕對唔會喺公開場合話幫手足的。

例如11/11-11/17 既中大保衞戰,同埋其後既理大保衛戰,大家見到幾張斷章取義既對話截圖,腦細的確係講左嗰啲說話(而我地絕對唔會有樣學樣,斷章取義式公開當時S 小姐團隊喺中大理大兩場戰役時,到底喺群組講過咩);而實際上,雖然有好多手足都聲稱喺中大丶理大保衞戰期間見到老細派貨,但係老細係絕對丶絕對唔會喺公開場合度親口講話當日有出現的。

腦細搞社運攞光環?

腦細不知何故收盡光環,但亦為此亦吸盡仇恨。腦細10/14在深水埗遭三名惡漢伏撃遇襲受傷,幸好沒有波及其他員工,包括S 小姐團隊。腦細亦分別於8/31 在西環及9/30 在深水埗兩次被捕,隨時面對刑事檢控。腦細表示光環係負資產。

國難五金成日扮大台同其他「國難」割蓆,仲逼人改名?

本店法律顧問表示,由於本店仍然被刑事調查中,為免影響本店案情(及為免本店案情影響他人)(同埋千祈唔好以為國難忠醫成員在廣州被拘留係同國難五金有關)。如發現坊間有與本店名稱相近的,須發文割𥱊以正視聽。撞名商戶或團體理解後選擇改名,絕無本店逼人改名一事。

國難家書陷害手足?

本店強調,自9/30 家書原稿被沒收至今,從來沒有人因為國難家書計劃而被捕。本店亦不會披露S 小姐團隊當時處理家書的手法,如何導致家書原稿被沒收。即使現時印製成書,匿名投稿的抗爭者仍然匿名。

– 未來發文改善

腦細公務繁忙加上性格暴躁,出post 有時會意氣用事而失言。為減少誤會爭執,我們增加了國難公關協助管理發佈內容,以往發文內容如有不當亦將修正或刪除。

本聲明發佈之時,本店Facebook 帳號被突然封鎖,隨後本店Instagram 及Telegram 帳號亦被黑客入侵操控,現時本店已無法操作任何社交平台帳號。面對幕後意圖滅聲的龐大網軍勢力,我們正盡力盡快重建帳戶,大家亦可親臨本店查詢最新産品資料。

本店亦在此譴責Anita Wong 針對腦細和法律顧問個人人身作出不實指控,兩位另有以下聲明回應。

國難公關 字

「李政熙聲明」

除左上面關於國難五金既嘢之外,回應一下私人事:-

– 腦細邊度黎300 萬投資入國難五金?

拜託唔好再誤會,300 萬梗係唔係我一次過放入去啦,最初投資啲錢買貨,賣完貨啲錢又再投資返入去買貨,滾下滾下個累計投資額咪有咁多囉

– 腦細賺大錢住公屋?

好遺憾我住址俾人起左底(其實2016 年參選區議會時候已經公開過🤷‍♂),但係天平邨其實係香港少數有「租者置其屋」計劃既公共屋邨囉

– 腦細賺大錢俾老婆仔女移民美國?

其實就係因為住址公開過,我成日都擔心屋企人安全,加上國難五金又引埋好多閒人,為左保護佢地我唯有送佢地去美國,多得我喺美國既細佬兩公婆幫忙。

其他私事我都唔想再回應了,如果大家真係咁鍾意對我啲私事食花生,咁我唯有食得咸魚抵得渴;我只係希望大家唔好俾推動呢啲人身攻擊既幕後黑手得逞。

李政熙 字

「黃天佑律師聲明」

本人獲邀出任國難五金法律顧問,並非國難五金員工,亦無參與任何國難五金業務經營。

Anita Wong 所指S 小姐與李政熙先生就終止國難五金合作一事,本人從未參與雙方協商談判,亦沒有見證雙方簽署任何協議。

就Anita Wong 指控本人脅逼S 小姐簽署協議,本人嚴正聲明絕無其事。本人在此保留一切追究權利。

黃天佑 字