邵嵐:打好國際線 勿再被代表

前兩日見到國際社會公認嘅香港民主之父Martin接受訪問時表示「倡攬炒者一無所知」,今日又見到首任政務司司長陳方安生表示要退落嚟,其實都幾感概。 舊年喺機緣巧合之下開始咗「打國際線」,其實都深明有唔少做開國際遊說嘅政客一直以嚟都堅信香港可以民主回歸中国。甚至乎係舊年革命開始之後,即使香港情況變得咁壞,都仲係有政客對外稱:「一国兩制未死」、「香港司法系統有險可守」。 好不幸地,事實就係仲有唔少外國政客、公民團隊會相信以上論述,令國際社會對香港人真實意願嘅理解有落差。而原因其實好簡單,就係因為我地本土派起步得遲,導致好一段時間喺國際舞台都係得返泛民嘅聲音。 好彩近年有唔少相信本土主張嘅海外港人組織成立,今次反送中運動又令唔少本土派政治人物開始發展國際線。 但隨住《国安法》嘅落實,好多事都須轉為地下化,可能好多人都即將被逼流亡。要做到好似泛民咁喺外國有話語權,未必我地就算各散東西都好,都一定一定繼續深耕細作,盡自己能力打好國際線。我地要將本土派嘅聲音變成主流,而唔再係由已經脫節嘅民主前輩代表我地。 我地要由香港真正嘅主流聲音,向自由世界為呢片土地爭取我地唯一嘅出路。 最近好迷茫,好多嘢都係未知之數,但唯一可以肯定嘅就係無論未來變成點,我同好多人都會繼續為呢個目標而努力:) (btw呢兩日真係好熱⋯擺完無咗半條命⋯⋯)

Read more