攬炒巴路線圖
今晨攬炒Channel、老豆搵仔等多個TG Channel都轉載此訊息，相信是「我要攬炒」團隊的抗爭路線圖：
好多人以為屌醒全民(aka 200萬)做勇武就得，而國際線、議會線係廢。
另一方面，有人以為齋等美國就ok，製造議會線同國際線假對立（白兵之流）。
有泛民就覺得法治有險可守，用愛與和平穿透坦克（黃碧雲、劉慧卿之流）。
———————
我整理過去一年思緒，得出嘅結論係：
香港人要保留語言、文化、自由、可持續經濟，就要有「主權」，亦即係 獨立。
以香港為本位嘅「民族意識」、「民主」就係防止獨立後政府賣港嘅兩重保險。
而「民主中国」、「復興華夏文化」就係一樣不切實際嘅幻想。香港人連生存都成問題，自己都未顧掂自己，仲搞乜野民主中国、復興華夏。
要搞唔係唔得，香港民族有主權、軍隊、國際承認三重護體先好諗。
———————
咁點獨立呢，我暫時數到有 5個重要部分/戰線，缺一不可。
1/ 革命意識（泛指反抗意志、民族意識、執政意志）
2/ 組軍隊 （海、陸軍）
3/ 國際承認
4/ 臨時（影子）議會、政府
5/ 金錢（亦即係黃色經濟體）就係貫穿、支援1-4嘅血液。
先講「1-革命意識」，革命本來就係一件唔理性嘅事；正因為唔理性，極權先無法全面控制。
人本來就唔係機械人，有情感，會非理性地保護，追求所愛之人、物。所以，暴政終會有失算，計唔到所有情況嘅一日，暴政必亡就係咁解。
泛民一直衰在太理性，一切太計算，亦令中共容易計算到由泛民帶領嘅香港人點反應。(學術少少，就係太多realism，而constructivism不足）
愈來愈多人屌「浪漫主義」，笑人送頭，高登係咁，城邦、熱狗、白兵、部分獨派又係咁。難聽啲講句，革命本來就係一件要靠人前仆後繼搏盡嘅事。浩浩歷史長河中，你、我、他都有機會成為犧牲一分子，只求死嗰陣對得住自己良心、對得住在世嘅人、對得住下一代。
「浪漫主義」本身並唔係一個問題，佢比絕望更好，俾到大眾前進嘅動力。極端追求浪漫主義當然有問題，但適當利用浪漫主義、靚畫面，其實可以增加凝聚力、士氣、吸納新血。
你估1860-70年代意大利、德國立國係石頭爆出黎？佢地成功立國就係靠1820-1870之間，史稱「浪漫主義時期」嘅年代，不斷孕育革命份子，前仆後繼「送頭」，最終革命成功。
套返落香港，要提倡革命意識，就要有道德感召、學術理論支持獨立、同引起民族共嗚。《香港民族論》係第一塊基石，《榮光》係第二塊里程碑，「攬炒意識」正正俾香港人放膽反抗、執政。
依方面，我會默默努力，但係絕對唔夠，絕對須要「香港獨立學社」、「國是學會」等等堅持出力，整高質文宣。佢地好多都只係學生，但係已經咁犀利，學術根基俾我穩10倍。所以，「拉闊個畫面睇」，我對依條戰線係樂觀嘅。
————————
第二，就係「軍隊」。我等咗好耐，依幾日連登終於有人開始講《東印度公司》，提倡間接建立武裝力量，而且反應幾好。
依方面唔係無人做，只係進度比較緩慢，因為勇武死嘅死、傷嘅傷、拉嘅拉，加上「無大台」教條主義阻礙殘餘勇武整合、重整旗鼓同技術傳承。
但係，有燈就有人。「1-革命意識」愈強，就愈多和理非會unlock 勇武mode。典型和理非衝破心理關口之後，就可以自由轉換和勇，真正和勇合一。依個亦比「三不」嘅和勇合一再進階。
正如鄭立所講，坂本龍馬成立「龜山社中」，間接建立海軍，亦為薩摩、長州兩藩推翻「幕府統治」殿下根基。
換言之，和理非要進化到隨心轉換和勇mode，而現時嘅勇武都要再進化（心態、戰術、裝備、胸襟）；停留喺街頭抗爭係未夠（我無叫你唔打）。另外，就係思考東印度公司、龜山社中可能性。
————————
第三，國際支援。有人開口埋口話「國際線」無用，話靠國際不如靠自己。依個係典型鑽牛角尖嘅假對立。
其實，國際線其中一維就係地下牽線為香港人尋找軍事訓練、裝備，支持上面嘅「2-軍隊」。無國際線，勇武要再進化會極為緩慢，組軍遙遙無期。
國際線另一維，就係地下爭取國際承認獨立地位。國際承認唔會無端端出現。我初步睇加泰獨立失敗原因，主要係缺乏國際承認獨立地位。佢有革命意識，有準軍隊（加泰警察倒戈），有執政意識嘅加泰政府，但偏偏只有中国暗中支援，無國際承認加泰政府；最終失敗收場。
而印度喀什米爾自治區無香港咁大國際戰略價值，以至國際脈絡，所以被滅區都無能為力。你話國際線重唔重要？xxx
咁係咪一開波就要手足喺國際線遊說大叫獨立？有個比喻好好，正如你對一個人有意思，係唔會劈頭第一句大叫「我要同你開房！」
同理，國際脈絡係要時間建立，以最容易引起共鳴、爭議最少嘅國際議題打開話匣子（警暴、人道問題等等）；隨住關係建立，可以再摸索討論其他議題嘅空間。而且，我地唔可以單方面叫人幫，而要互相支援、尊重，關係至會長遠、雙贏。
仲有，國際線唔係同本土線對立。本土社會應該盡情叫「獨立」，喚起民族、革命意志。國際線有國際線內儉揼石仔。睇國際線，唔好再睇得咁片面。自己香港自己當然要救，但只靠自己註定失敗。
—————————
第四，臨時議會、政府。一個地方要獨立，唔係齋靠讀獨立宣言就得。上年有兩次臨時議會、政府宣言（721、1004）都係以失敗收場。
究其原因，一無確實可行計劃，成立具民意認受嘅臨時議會，二未有廣泛執政意志。想了解臨時議會、政府重要性同成立方式，可以睇一睇美國、愛爾蘭嘅議會係點成立。
—————————
最後，錢，係支援四大獨立元素嘅營養液。有目標地投入金錢，成件事就易搞好多。
黃色經濟圈一路發展成黃色經濟體，就會幫助引導金錢資源去返四大獨立元素、戰線。而且黃色經濟體可以minimise同中共攬炒、抗爭對抗爭一方帶黎嘅collateral damage。
另一方面，黃色經濟圈更加係保護本土文化嘅重要防線。一年前，大部分90、00後以飲喜茶、食探魚、海底撈、玩抖音而自豪。反送中初期，有連登仔笑人一邊反送中，一邊自願送中；而鐘意飲喜茶嘅人就話無得咁計。
好好彩，隨住黃色經濟圈堀起，香港人開始明白本土文化、良心有價，修復香港文化失地；而紅色嘅喜茶、海底勞亦執得七七八八，藍店呼天搶地。
———————
總之，革命意識、軍隊、國際、臨時政府、錢係五大元素、戰線，環環相扣，工程浩瀚。
有無力感好正常，因為成功，可能唔係你本來所諗1-2年就達到。俾極權打到你失去方向感，亦情有可原。
私怨，唔係唔可以數，但數完就應該繼續揼石仔；批評，唔係唔得，但態度好、有深思嘅批評先會有正面交流，推動進步。
一認清自己有咩應該做，可以點進化，放開胸襟，香港民族成功只係時間問題。
-------------------------------------------------支持《多聞》眾籌計劃，我們目標是集資12萬加元，這筆錢遠不夠在報紙買頭版，但可支持《多聞》抗共2年！
Bank interact 課金給《多聞》：tohk928@gmail.com
Subscribe us in:
Telegram Channel:
https://t.me/tohknews
Facebook:
https://www.facebook.com/多聞-117598966317804
Twitter:
https://twitter.com/TOHKNEWS
Reddit:
https://www.reddit.com/user/TOHKnews
Share this article to:
