卡城大少:我認識嘅加拿大(二)

好多人都唔知加拿大其實係全球五大糧食出口國之一,由於亞省(Alberta),沙省(Saskatchewan) 都有土地位處全球兩個黑土帶其中一個,所以土地特別肥沃。呢個黑土帶地區出產出嘅小麥,質量頂呱呱,連義大利佬都買嚟做佢哋嘅pasta;香港好多要求高嘅點心師傅,都會指定用亞省嘅麵粉做叉燒包。亞省南部Taber鎮出產嘅粟米,食過你就知道乜嘢叫極品。

亞省牛肉世界馳名

另外亞省牛肉(Alberta Beef)亦係世界有名,除咗加拿大牛肉評級要求標準比美國牛嚴格之外,亞省牛一定要在亞省飼養並要喂飼最少120日亞省出產嘅五穀(黑土帶出產嘅穀物),先至可以叫做亞省牛!至於長毛牛Bison (又叫水牛),味道正到痺,但係產量極少而且貴,我自己真係唔捨得食🥺😬。加拿大亦有大量豬肉出產,30-40年前已經有出口返香港畀餐飲業,不過近年就畀強国公司入嚟狂掃。

亞省AAA牛

至於啄地,加拿大本地人都係喜歡白肉(即係雞胸肉),而且多數都係籠養30-45日嘅雞種,肉質比較梅,香港人絕對唔喜歡。好彩20幾年前卑詩省(British Columbia),已經有人引入台灣走地雞嚟養,價錢雖然比本地“監躉雞”貴30%,不過仍然非常受亞洲食客歡迎。東岸魁北克省(Quebec) Brome Lake出嘅鴨就係北美名牌,廣東燒臘師傅至愛!鴨種原來係百幾年前嚟起鐵路啲廣東人帶過嚟加拿大嘅!

卑詩帶子金牌之選

加拿大東西兩岸有大西洋,太平洋,又擁有全球最多湖泊面積;所以海鮮,河鮮基本上係多到不得了。東西兩岸出名嘅生蠔品種起碼30隻,BC嘅甜蝦,象拔蚌,東岸嘅龍蝦,北極貝,海參,紅海膽,綠海膽。另外加拿大比較多嘅Dungeness蟹,雪蟹(近似北海道松葉蟹);可惜亞拉斯加皇帝蟹已經畀人食到接近絕種,美加政府嚴格限制採捕數量,好難食到。(亞洲地區呢10幾年食到嘅,多數都係俄羅斯水域出品,顏色帶啡)。順便提一提BC省Qualicum Beach出嘅帶子(scallop),曾經攞過American Masters of Taste 嘅 Superior Gold Medal”(超級金牌),捨得食嘅,一定要試!

北極貝

淡水魚出名嘅就有畀香港人食到貴晒,香港叫銀鱈魚嘅黑魚(Black Fish),BC又有人養鱘魚 (Sturgeon) 取卵做魚子醬,所以耐唔中有鱘魚賣。

安省冰酒只此一家

仲有唔可以唔講嘅就係加拿大安大略省(Ontario)出嘅花旗參,比美國威斯康辛州 (Wisconsin)嘅貨靚好多,聞一聞就分到。另外安省出嘅冰酒,全球獨一無二;近年BC省都有葡萄酒庄釀製,不過有部份係以人工冷凍而唔係室外天然結冰葡萄釀造。

加拿大人唔似香港人,平時夜晚好少出街食嘢。每次出街食,都係有特別原因或者社交聚會。我諗除咗因為價錢貴,加拿大人晚上比較注重家庭生活,冇乜特別事,寧願留喺屋企。一講到出街食嘢,我覺得好多香港人去到火星都要搵中餐食😅;不過我觀察到過去20年中餐館數目其實係不斷減少。若論亞洲餐飲五大-中日韓越泰;日本,越南餐館數目增長係幾倍,韓國及泰國菜都開始受歡迎。

外膳喇脷稅連貼士

點解我話出街食嘢係好貴?因為去餐館食嘢你埋單嗰陣,先有5%聯邦政府GST,另外再加5-9%省政府銷售稅(PST),或者13-15%合拼銷售稅(HST)。即係有10-15%稅,再加10-15%,甚至20%貼士!記住,你若果只係畀10%貼士,會係超樣衰!除非嗰度係一間甩毛中餐館,或者非常唔滿意伙記嘅服務,否則你以後都唔好再去食!😅😅

30-40年前喺北美洲去食中國菜,係一件好隆重嘅事,西人朋友會著到好行,甚至出埋Tuxedo,但係今時今日,尤其是近20年來多咗某国人接手做中餐館之後,主打抵食夾大件而唔係色香味,搞到真係唔窮都唔去食中餐。溫哥華多倫多可能仲會好少少,其他城市就真係冇乜有水準嘅粵菜;好彩我哋Calgary都仲有一兩間做得唔錯,不過就係好X貴!🙄

唔出街食,自己玩煮飯仔就真係慳好多。如果你唔怕麻煩一定要餐餐中式:三餸一湯,白飯任裝。以兩葷一素一湯計,我估計材料成本大概$20加幣左右,若果有海鮮就加$5-10蚊。加拿大一樣大把香港食物供應,而且更有日韓越泰印呢啲亞洲食材及香料供應。好似我啲噉嘅飯桶,除咗泰國香米,美國絲苗,日本珍珠米都比香港平,唔怕食貴米!😅

新鮮蔬果價廉物美

至於蔬菜生果,選擇多到你產生選擇困難症,價錢爛賤到你懷疑人生!BC省嘅紅地喱蛇果(Red Delicious Apple),以前喺香港只係過時過節先有機會見到(不過未必有份食😭),嚟到加拿大,當然報仇咁報,買一袋返嚟食唔晒就搾汁當水飲!😜😎 七月中開始供應嘅車厘子,$3-4蚊一磅,絕對食得起!至於季節性嘅生果,包括荔枝,龍眼,楊桃,火龍果,菲律賓芒果,美國士多啤梨都係定是定候有供應。唯一就係和牛,香印提子呢啲日本名貴食物,暫時少見。

今次附圖嗰鑊雞柳義瓜炒義大利麵,係小弟今晚自己一手一腳包辦:義麵半包$0.8,Zucchini 半條$0.8,雞全脾一隻拆肉$1.3,連埋醃料蔥油,蠔油,成本$3.0加幣左右,夠我食兩餐。若果出街食,應該要$13-14蚊加稅加貼士!

加拿大窮L又一餐啦😋😅

-------------------------------------------------
支持《多聞》眾籌計劃,我們目標是集資12萬加元,這筆錢遠不夠在報紙買頭版,但可支持《多聞》抗共2年!
Bank interact 課金給《多聞》:tohk928@gmail.com
Subscribe us in:
Telegram Channel:
https://t.me/tohknews
Facebook:
https://www.facebook.com/多聞-117598966317804
Twitter:
https://twitter.com/TOHKNEWS
Reddit:
https://www.reddit.com/user/TOHKnews

Share this article to: