卡城大少:我認識嘅加拿大(四)

加拿大衣食住行之第三部份「住」

加拿大係全球面積第二大國家,有998萬平方公里,但係人口只有3千6百萬;當年東莞全盛時期嘅外省勞工數目都隨時多過我哋成個國家嘅人口!加拿大東岸有大西洋,西岸太平洋,北面就係北冰洋,海岸線達到24萬公里,有10個省4個特區 (特區嘅意思即係特別少人,特別凍嘅區域噉解)。講咁多廢話其實係想曬吓命,話你知加拿大真係好大好大;加拿大人嘅居住環境空間真係正到可以恨死好多香港人!提一提大家,加拿大係有銷售稅,10個省除咗Alberta,個個省都另外再有省銷售稅!即係你喺加拿大大部份地方嘅消費,除咗聯邦政府收嘅5%GST之外,另外9個省都會另外再收5-9%省銷售稅PST (或者總共13-15%合拼銷售稅HST)

先講城市,加拿大首都係渥太華(Ottawa)。至於香港人嘅最熟悉嘅就梗係多倫多(Toronto),溫哥華(Vancouver)。另外法語地區城市區滿地可(Montreal) 與及近20年開始出名嘅隱形富豪城市卡加利(Calgary),與及愛民頓(Edmonton) 都好多香港人。溫哥華,卡加利更加係多次入選全球10大最宜居城市。

溫哥華係全加拿大平均氣溫最暖嘅城市,未必年年落雪,不過夏天雨水特別多,好多喜歡陽光嘅人就未必鍾意。溫哥華應該係北美洲 (甚至全球) 數一數二嘅美食之都,無論中菜,日本菜,西餐選擇極多;好多飲食界名店例如$6億身價超高級中菜館Hakkasan都喺Richmond插旗。經常聽到加拿大人講大溫地區,低陸平原,其實就係指溫哥華市與及其附近一帶城市,包括二埠(New Westminster),本拿比(Burnaby),北溫(North Vancouver),高貴林(Coquitlam),列治文(Richmond),素里(Surrey),三角洲(Delta) 等等。80/90年代,溫哥華係香港移民首選;天氣當然係主要原因啦,不過比起多倫多,香港過去係飛少四五個鐘,對嗰班做生意成日要飛嚟飛去嘅太空人嚟講,係好大分別。可惜近15年溫哥華已經漸漸畀強國人攻陷,尤其是Richmond,基本上係冬瓜天下!

至於東岸安大略省嘅多倫多,加埋附近一大堆城市,就係全加拿大人口最稠密嘅地區,亦都係加拿大嘅經濟金融中心。不過治安就好似麻麻,都有聽到新聞報導幫派之間因為爭奪毒品地盤而在街頭開鎗駁火!由於我未曾在東岸生活過,呢部份希望等當地朋友幫手補充。

至於Calgary,好多人一聽到第一反應係好X凍😂。其實Calgary係全加拿大有最多陽光日子/時間嘅城市;就算喺係冬天零下20°C,戶外係陽光普照一片藍天,冇咗嗰種冷冰冰嘅感覺。氣溫雖然低,但係畀溫暖陽光曬住條命嗰種感覺真係超正!仲有一個冇乜人知嘅秘密,就係地理位置原因;Calgary冬天經常有南面美國Montana州吹過嚟暖流 (Chinook),對抗冷空氣令到氣溫回升,冇嗰種寒風刺骨嘅感覺。Calgary最唔好就係除咗屋價比溫哥華,多倫多平之外,乜春都貴過人!

特別提醒:加拿大所有建築物都有中央暖氣,話之佢出面有幾凍,你若果唔係需要在街外停留超過20分鐘,基本上係冇乜大問題。

講到居住,有一點非常重要,我要先講一講。由於北美洲地理環境原因,大部份地區嘅風都係由西吹向東,所以大部份城市形成初期,都係揀喺城市東邊做工業區,西邊就係住宅區;噉樣工廠區產生嘅廢氣就唔會吹返去住宅區。呢種習慣日積月累就變成工廠老板或者收入好啲嘅中產都住喺屋價地價較高城市西邊;工廠工人,普通眾動階層就聚居東邊。由於加拿大過去50年都係靠移民入嚟去維持人口增長 (冇錯,60年代尾已經有研究指出若果加拿大唔收新移民,唔駛100年時間加拿大就會變成一個冇國民嘅國家),東西兩岸幾個受移民歡迎嘅城市都發展得好快,地界不斷伸展。若果要買新屋,喺新區就一定多選擇;不過公共交通配套就一定有排先會完善,所以唔識揸車或者養唔起車嘅,就要睇睇往來工作地點嘅交通安排。至於交通方便嘅舊區,新起嘅房屋就一定係拆咗舊嘅嚟重建;而且多數會增加密度去補返數。例如溫哥華地區有發展商用10年時間收購一個路段4-6個相連地;原來每個lot係一間獨立屋,收購之後拆晒就好少起返4-6間獨立屋。佢哋會向市政府申請修改zoning由獨立房屋變成多戶房屋,兼且增加地積比 (FAR: Floor to Area Raito)。佢哋嘅申請唔單止會叫到盡,好多時都會叫凸,等佢哋可以起多一兩層,多幾個單可以套現!所以揀屋時若要地點方便,又多公共交通選擇嘅,同類單位呎價一定比新區貴。

加拿大無論東西兩岸,都係獨立屋佔最大比例。除咗獨立屋,仲有Duplex (孖屋),Fourplex (田字屋或者前後孖屋),Townhouse (排屋),Condominium (共管公寓),Condo Apartment (共管多層大廈),Apartment (出租大廈)。提一提大家,有Condo 呢個字意思就係成座建築物裡面每個單位都係可以單獨買賣,並且由所有業主以立案法團(Condo Board) 形式一同管理,Apartment 就係一個大業主只租不賣,自己或者委託物業管理公司做管理 (全加拿大有三萬幾個出租單位嘅最大私人業主Boardwalk就係一間只有30幾年嘅Calgary公司,我遲啲會講佢哋嘅發績故事)。

地點位置講咗,房屋種類講咗;租或買就視乎個人需要而決定。至於價錢,無論租或買,就算同一城市都會有好大分別。我唯一可以畀嘅意見就係,選擇居住地點最好就係方便往返工作或者學校地點為考慮優先。計一計慳返嘅來回交通上嘅時間,都係另類成本。有興趣睇加拿大房屋放盤資料,可以去呢個網站睇吓 (mls.ca)。

-------------------------------------------------
支持《多聞》眾籌計劃,我們目標是集資12萬加元,這筆錢遠不夠在報紙買頭版,但可支持《多聞》抗共2年!
paypal課金給《多聞》:paypal.me/tohknews
Bank interact 課金給《多聞》:tohk928@gmail.com
Subscribe us in:
Telegram Channel:
https://t.me/tohknews
Facebook:
https://www.facebook.com/多聞-117598966317804
Twitter:
https://twitter.com/TOHKNEWS
Reddit:
https://www.reddit.com/user/TOHKnews

Share this article to: