手足投稿：見到雞腸好想死

#流亡手足投稿

其實我英文好屎。由細到大見親人都講中文，上網又同人用中文傾偈，課外書又睇中文書，最多係啲教科書用英文字，同埋英文堂要講下英文。無錯英文夠碌入大學，但係去到外國，啲人聽唔明我噏乜，成日要我講多次。白人啲英文易聽啲，即使講得快，聽多兩聽就慣。印度人啲英文最難聽，佢啲口音重到我完全唔知佢講緊英文，但係白人識聽喎。

佢地好興唔理你聽唔聽得明，一輪咀咁係咁講。好多時，每一隻字都聽得明，每一句都聽得明，但佢講咁快咁多，聽完第二句已經唔記得咗第一句。中文無呢個問題，但英文就要全神貫注先有機會記得。無計，我地個OS係中文，聽到乜都要轉返做中文先明，咁已經慢咗。

不過人在外國就要適應。

呢排我溫緊書考Ielts，因為呢邊大學有英文要求。我唔係無信心，但都唔係有信心。如果考唔到，可以讀俗稱E科的英文課程，跳過個入學英文要求。不過呢啲科目好很貴，對於有錢仔唔係問題，即係對於我呢啲窮撚嚟講係問題。我地呢啲窮撚根本就無錢喺度奢侈，好多時係靠家長接濟。試諗下家長自己都唔捨得使，俾咗啲錢你，點知你拎去揈，佢都肉赤啦。

家長都對我好好，不過佢地泛民底，同我地呢啲本土撚係有代溝。佢地呢個年紀唔做藍絲已經好好，仲好有心咁幫我地。不過你知泛民幾咁大愛，幾咁和理非架啦。同佢地講勇武抗爭，就好似黃蓉教郭靖梅花易數、五行八卦咁，不如慳返啖氣啦。

長貧難顧，我地初到貴境無人無物，家長會仆心仆命咁支援我地。但我地都要學好英文，喺呢度讀書、拿呢度嘅學歷喺本地搵工，自己養自己。如果我地唔發奮自強，家長幫到我地一時，幫唔到我地一世。

講住咁多，我都係死返去溫書算。屌，一睇到雞腸就頭暈。

-------------------------------------------------
支持《多聞》眾籌計劃，我們目標是集資12萬加元，這筆錢遠不夠在報紙買頭版，但可支持《多聞》抗共2年！
Bank interact 課金給《多聞》：tohk928@gmail.com
Subscribe us in:
Telegram Channel:
https://t.me/tohknews
Facebook:
https://www.facebook.com/多聞-117598966317804
Twitter:
https://twitter.com/TOHKNEWS
Reddit:
https://www.reddit.com/user/TOHKnews

Share this article to: