專欄

某某鬧香港人乜乜物物，我慣常會順住佢嘅指控推演，睇下能否成立。例如「香港人唔勇武，所以今日抵死」，如果有一萬個肯殺人嘅勇武出到黎，香港能否獨立？我當然想成功，不過呢班人如果無單一領袖，就係一堆小軍閥內戰，即係今日黃店鬥黃嘅武力版。有單一領袖，又可能係小肥金嘅雛形。政府必然會提升至反恐規格，甚至視為對主權挑戰然後出老解。美帝會否支持？可能會，但亦可能覺得你唔值得落注，由得你死。 簡而言之，全民勇武未必會演變成大家理想個畫面。 「太過和理非」個盡頭今日大家經歷緊，唔駛多寫，你越好恰，對面就出盡力拉、打、老強、推落樓、全家滅口… 仲有d古靈精怪指控，例如日日鬧香港人鳩戴口罩所以被制裁又經濟崩潰。好簡單，幻想一下當初香港人唔戴，佢所講嘅壞事會否發生？經濟一樣會衰退，美國一樣會視Hong Kong is China 咁樣制裁，甚至會有更多人染上惡疾，重病但又死唔去，所以鳩戴口罩個指控是廢的。 香港人太沉迷選舉，所以今日仆街…我都有鬧過。但係即使2016年所有泛民屌晒老母話唔撚選，你班港共中共玩撚晒佢啦！2020香港條路又會否不同？2016仲係奧巴馬親華年代，英揆金馬倫都係一貫縮骨口惠，好難出現今日嘅破局。 好多即時戰略遊戲近年放棄「單一最強兵種」路線，即係你組到一群重騎兵一隊宇宙艦隊，對面總有些兵種剋正你，要戰勝對手，必須混合不同兵種互補長短。 呢個年頭，和理非網上寫文宣可以被拉，甚至靜靜雞有國安pm叫你收聲（聽過幾個case，有一日我收皮大家心照）落街貼連儂牆會被斬被捉去強姦。 勇武行動者背負嘅風險代價，更加大到唔駛講，打劫銀行都無咁痛苦。國際線要好大氣力先至換到少少口惠，甚至純粹想海外營商都被設局搜捕。所以唔好再幻想有單一solution出現解決眼前困局，更加毋須因為呢個條件未出現就怨天尤人，2014都無人想過2020香港人咁接納勇武行動啦，當年擋格一下警棍已經要出post爭論有無破壞個運動。 現在係最好嘅時代，亦係最壞嘅時代，要仆嘅街點都要仆，唔好幻想自己30蚊買入匯豐控股然後150蚊放你身家會漲幾多，踏實諗點樣生存同埋增強實力。至少，保持審慎樂觀預備持久戰。

一個平民力量好有限是嗎？現在好多有國際知名嘅KOL，當初都係關注某個議題，受媒體注目後「上到位」，本質佢地依然係普通市民。國際KOL唔會令你有槍炮軍隊，但係日後非常有用。 假如有日香港陷入無政府狀態，一個區議員就係代表到一個區嘅政府。咁當然，一個警署就係小軍閥，至少美國sir未泊岸之前都會係咁。今次武肺大家應該體驗到，能夠撲到口罩洗手液嘅人，突然圈到一班香港人，in a very limited capacity 係暫時代表一群香港人，向外國供應商談判，呢樣本身係香港政府層面嘅工作，由香港人自己唔覺意做咗。 撲口罩係好小事，點可以同一個政府去比？無錯，管治一個國家，涉及好多資源分配同協商，今日大家試左撲口罩，可以算係一個入門實習。之後嘅水電、糧食、醫藥、物流、軍備、貿易…全部係放大左嘅「撲口罩」。 如果美中打仗，香港暫時兵荒馬亂，糧水供應不穩，點樣撲糧撲水搵藥？俾咩人？供應商信唔信你？每個地區關注組，或者知名KOL到時就發揮到作用。 KOL唔駛日日講到甚麼政治偉論，你知道幾時缺米缺口罩etc，你知道點樣撲，你有一群人係優先照顧，你就已經係KOL，如果你個圈子提供到嘅「服務」越多，影響力越大，一群影響力大嘅細圈子組起來，就係聯合政府。 有無咁兒戲？邊有咁簡單呀！ 無話過簡單，但係好多大事都係由睇落好兒戲嘅組合辦到。胡志明連美國佬都打得贏，當初只係一個教書先生，無人無物。